Khotbah Minggu, 09 Desember 2012

JAMITA MINGGU, 09 DESEMBER 2012

MINGGU ADVENT II

EP:  Pilipi 1: 3-11               EV: Maleaki 3: 1-4      S.PATIK: Jesaya 42: 6-7

MARPARBUEHON NADENGGAN MANOMU HARORO NI TUHAN

I.                    PATUJOLO

Ia panurirang Maleaki on, ima sahalak panurirang namangula dung mulak bangso Israel sian habuangan Babel. Dihatahon do tu bangsona tu sangkap ni Debata tu bangsoNa Israel ima laho paradehon dalan tu haroro ni Sipalua i. Dipatorang do dijolo ni turpuk on (bindu 1, 2) paboa nagodang do dosa naniulahon ni bangso i, isarani pelean nadirumari dohot angka malim naso mangaradoti sipatupaonna/ ulaonna manegai goar ni Debata dohot pelean tu Debata (1: 6 - 2: 9), ragam naso satia diparsaripeonna (2: 10-16). Marhite pangalaho ni bangso i ndang diparrohaon Debata be bangsona ala nungga jonok ari paruhuman, alai molo olo do bangso i paubahon rohana marpangulahi do roha ni Debata; ai dilomohon roha ni Debata do halak siulahon hasintongan dohot namangulahon lomo ni rohaNa. On ma napinatorangna diturpuk jamita on taringot tu haroro ni Tuhan nanaeng manguhum nasida

II.                  HATORANGAN NI TURPUK

Disuriranghon panurirang Maleaki do taringot tu haroro ni napinarbaga i dohot hata patujolo “Ida ma suruonKu ma suruanKu, asa dipadiri dalan di jolongKu” (ayat 1). Bagabaga on diida panurirang Maleaki sian 3 bagian/ hal:

1.      Diida ibana do ia baga-baga haroro ni Tuhan i na ro manopot joroNa, ima laho paposhon haporseaon ni angka naporsea hombar tu naniluluan dohot hinalungunhon ni angka naporsea i (Kedatangan yang secara konstruktip) (ayat 1)

2.      Naro do Tuhan i laho pasohothon haramunon na pinatupa ni angka malim namangkorhon hasusaan dohot halumlamon, jala molo ndang diotapi gabe jumpang tutoru uhum (kedatangan na destruksip)  (ayat 2-3)

3.      Domu tu hataridaan  ni halak naporsea manomunomu haroro ni Tuhan i. Digombarhon sihol ni roha ni Debata laho patotahon hapolinon haporseaon marhite napaulakkon hasomalan ni ngolu songon uju diangka taon mulamula (ayat 4)

Sian hatorangan natolu ondeng, nuaeng ditangkasi do hita dingolu parugamoonta songon halak namaimaimahon haroro ni Tuhan i. Songon dia do dasorta manghaporseai haroro ni Tuhan i?; songon dia do hita mangolu dohot marparange? Hot dope hita managam haroro  ni Tuhan i? Molo hot boha do hita mangolu? Jala ise do mangatur ngolunta?

Godang do nuaeng halak diatur angka namasa (songon pandohan mangida namasa ma, hape namasa naniida i pe ndang nadenggan parulaonna/pelaksanaanna). Angka hasomalon nasaleleng on dope dipangke (membenarkan yang biasa), nungga olat ni dia hasomalanta mangula hatigoran, jala marsihohot manjamothon tardisi marhuria di bagas joro?. Boha nungga tagamon naung matoras haporseaonta? Ima sipamanatonta.

Uju dihabuangan Babel nungga tung mansai ragam parngoluon ni bangso i nasunsam, hahurangan ni bangso i ndang holan dihagaleon ni ruas sambing, alai mansai nalnal dohot do ditujuhon nang tu angka malim dibagas joro. Malim namartugas siondihon bangsoi, hape di ngolu siapari nungga mansai dao sian aturan ni Tuhan. Nungga dipelehon tu langgatan angka pelean naramun, angka naroa, namarsahit. Sauhut pelean angka narumoa nungga diampini/ dilegitimasi marhite namandok ndang pola naroa i (1: 6-10). Ndang holan dibagas joro i dilegitimasi alai dohot nang tu ngolu ni bangso i siganup ari. Ndang dijamothon angka malim be parsaripeon nasida (2: 11). Hinorhon ni pangalaosion dohot parange ni angka malim i, nuaeng ro ma angka lumba-lumba na koras sian panurirang Maleaki, “...... ala nungga dilojai angka malim be Jahowa marhite namamangke hata ni Debata (dipolitisasi), nasa siulaon hajahaton denggan do roha ni Jahowa marnidasa, jala marlomo ni roha Ibana marnidasa” (3:17). Alani pangalaosion ni angka malim i ingkon masa ma toru-toru dohot uhum tu bangso i. On ma sada haimbaruon asa sude malim dohot bangso i parade diri mangantusi jala marparangehon sangkap ni Debata manomunomu haroroNa, dohot mangantusi uhum hatigoran ni Tuhan i di ngoluna.

      Marnida godang ni angka hahurangan ni bangso i, jala naso mardalan be parmahanion bi angka malim tu bangso i, dibagas joro nang di ngolu siganup ari. Hinorhon ni i, ingkon sange nama mangae sude bangso i jala hona toru ni Tuhan i. Ise ma manaham di ari haroroNa i? Jala ise ma manahan jongjong molo dipataridahon Ibana diriNa? Ai songon api ni panopa do Ibana jala songon sabun ni panunsi (ayat 2). Sian on ia diharoro ni Tuhan i naeng sude halak naporsea ruas, dohot malim paimbaruhon ngoluna.

      Songon hatandian ni angka malim adong do dilehon tugas parmahanion mangondihon bangso i. Jadi hundulma Ibana hira sipangalala dohot sipapita perak. Asa papitaonNa jala lalaonNa nasida laho papitahon songon sere dohot songon perak, asa gabe siboan sipanganon nasida tu Jahowa dibagasan hatigoran (Ayat 3). Dison ulaon nabadia naeng ma ulaon ni angka malim asa nang ruas ni huria lam manghangoluhon panghophopon ni Kristus Jesus. Amen