Acara Kebaktian

ACARA PARTANGIANGAN LAHO MANABURHON BONI

DI HKI PANIARAN, RESORT PANIARAN - SIMAMORA

MINGGU,  14  OKTOBER  2012

(Sude boni nanaeng sisaburhononhon tu ladang i asa dipapungu ma tu jolo ni langgatan on)

01.       Votum

P          : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia namanompa langit dohot tano on, dipasaor ma Damena tu Tondinta. Amen. Laos rap ma hita mandok tangiangta i

P + R   : Ale Jesus Tuhan nami bereng hami na dison. Pinarmahan mi do hami saluhut na dison sai asi rohaM  di hami sai pangolu hami on. Amen

02.       Marende Huria: BE. No: 6: 1 + 3 “Puji Jahowa Nasangap”

1.      Puji Jahowa nasangap huhut marmulia, hamu sudena parroha naringgas naria.

Marpungu be marolop-olop sude, hamu sude manisia.

3. Puji Jahowa naung tipak manompa dagingmu, jala natongtong manumpak hisar pamatangmu. Jotjot do ro pangurupina tu ho, uju naro hagogotan

03.Ayat dohot Tangiang

P          : On pe, saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin.

Martangiang ma hita: Ale Tuhan Debata Ama nami na di banua ginjang. Sasada Ho do siparmahan nadenggan roha. Namarpungu do hami nuaeng martangiang, laho pasahathon pangidoan nami tu Ho. Huhaporseai hami do, Ho do Debata mula ni nasa na adong, Ho do sitompa na adong hian naso adong hian, jala mambaen manjadi sude nasa naniula. Nuaeng huboan hami do boni on tu joloM, asa jumolo pasu-pasuonMu andorang so husuan hami. Asi ma roham ale Debata, sai ramoti ma na huula hami, asa dao sian angka bala, isara ni aek magodang, antingango, gulok-gulok ni tano, alogo manang ambolas, ro di manang aha pe tahe na tau manegai na huula hami. Lehon ma udan dohot las ni ari ditingki halehetanna asa tung mansai denggan tano hatubuan ni suansuanan natau gabe hangoluan nami. Hupangido hami ma tu Ho, sai parrohai jala ajari ma hami marhaseanghon gogo ni naniulanami ia tung maruli pasupasu sian Ho, asa hupatupa hami i tu namarguna di  hami, jala tau pangalapan sangap di goarMu. Sai tangihon jala oloi ma pangidoannami on, marhitehite Tuhan Jesus Kristus Tuhannami, Amen.   

04.       Liturgi I: Panompaon ni Debata di Jolma Dohot PanarihononNa (Niuluhon angka Ina)

05.       Martangiang Sian Sahalak Ama : (Manangianghon angka ianakkon na diparsikkolaan, na di luat parserahan lumobi na dibagasan parsahiton, dohot angka ina asa ringgas mulaulaon nang tarlobi tu parmingguan)

06.       Marende Huria, BE. No: 312: 4 “Puji o jolma ma bona ni hanguloonmu”

4. Sai parmahani ma hami na di halongonan, jala patau tu haroan di banua ginjang. Togu tongtong hami na loja dison sahat tu paradianan.

07.       Martangiang Sian Sahalak Ina: (Manangianghon boni sisaburhonon asa dipajengkar Debata,  dipadao nang angka gulok-gulok namanegai, dilehon nang udan paremean, songoni nang angka las ni ari,  angka hahipason, angka ama asa ringgas mula-ulaon tarlobi tu parmingguan.)

08.       Liturgi II: Respon ni Jolma i Taringot tu Panarihonon ni Debata (Niuluhon angka Ama)

09.       Martangiang Sian Sahalak Parhalado: (Manangianghon angka ruas ni huria asa dibagasan  hahipason dohot ringgas ni roha laho manngula-ulaonna tarlobi manaburhon boni sisaburhonon songoni nang tu parmingguan.)

10.       Marende Huria, BE. No: 194: 2 “Aut so asi roham”

Mauliate ma di Ho o Debata ala basam. Sibahen dalan i marhite Anakmi tu banuaM.

11.       Jamita: Psalmen 104: 27 - 28

12.       Marende Huria, BE. No: 373: 1 – 3 “Mangula hita Jolma” Huhut Papungu Pelean

1.      Mangula hita jolma manabur boni i, alai anggo jadina di Debata do i. Dilehon las ni ari, nang nambur udan pe. Tongtong dipanumpakna marguru sasude. Nasa uli basa ro sian Debata, ipe Ibana puji huhut haposi da.

2.      Sai sian Debatanta do nasa na adong, nang rihit sangkamata, nang laut nang tano on. Tinompa ni hatana do hau nang bulung i, nang nasa parbuena nang bunga-bunga i. Nasa uli basa ro sian Debata, ipe Ibana puji huhut haposi da

3.      Ibana jumadihon panondang sasude, Ibana do manjouhon alogo ombun pe. Natau tulus rohanta hipas dagingta i, tongtong rade bohalta dibahen Tuhanta i. Nasa uli basa ro sian Debata, ipe Ibana puji huhut haposi da

13.       Tangiang Panutup: Tangiang Pelean, Parsuruon mulaulaon, dohot Tangiang Hatopan

(Andorang so martangiang jumolo ma namanguluhon manaburhon itak puti tu boni sisaburhononhon i,  jala laos ihutma didok hata ni umpama taringot tu namanaburhon boni: Tu sanggar ma amporik, tu lubang ma satua. Sinur ma napinahan gabe naniula, horas hita jolma).  

P          : Debata Jahowa parasiroha jala pardenggan basa naung mangalehon hahipason di hami dohot gogo gabe tarbahen hami hobas mangulaulaon di ngolu on. Hatam do namandok “Ndang tarula hamu agia aha, anggo so mardongan Ahu” ido nahuingot jala huhaporseai hami. Antong tapangasahon ma Jahowa namandongani, mangiring-iring dohot margogoihon hita di angka ulaonta namarragam i. Ai Ibana do na gabe ombun namarsijongjong mangalinggomi hita di hos ni ari, jala marhitehite api namarsigorgor bornginna i laho manulu dalanta dohot palashon hita dingali ni ari asa tarbahen hita mardalan didalan hatigoranNa i dohot mangula ulaon siganup ari

R         : Ale Tuhan sai pangolu ma hatam dibagasan roha nami asa marurat jala tubu i di roha nami, nagabe paringgashon hami mangula angka ulaon di ngolu on

P          : Togu ma haporseaonmu, radoti ma poda hombar naung niajarhon tu hamu, ingotma hata ni Tuhan namandok “Na so ra mangula unang ma ibana mangan”. Ima tiop, paringgas ma roham mangula-ulaonmu

R         :  Ale Tuhan sai pangolu ma hatam dibagasan roha nami asa marurat jala tubu i di roha nami, nagabe paringgashon hami mangula angka ulaon di ngolu on

P          : Unang pangasahon gogo dohot pingkiranmu laho mangula siulaonmu, alai pangasahon Debata najumadihon saluhutna i. Martangiangma hita pasahathon peleanta tu Debata; Ale Tuhan Debata Ama nami na di banua ginjang ……………, Amen, laos rap ma hita mandok di tangiang hatopan i. Amen

P          : Pasu-pasu

P + R   : Mangendehon Amen, Amen, Amen

LITURGI LAHO MANABURHON BONI

Liturgi I = Panompaon ni Debata di Jolma Dohot DipanarihononNa

1. Di ari paonomhon do Debata manompa jolma baoa dohot boruboru, tu dos tu rupaNa do jolma i ditompa, jala dipauli do jolma i di porlak Eden inganan nasonang.

2. Alai ndang olo jolma i hot di inganan na pinarade ni Tuhan, sai naeng do dipatupa jolma i inganan hasonangan di rohana mangasahon roha nang pingkiranna sambing. Hape ndang diboto jolma i na dosa do songoni di Adopan ni Debata, gabe madabu tu uhum ni Jahowa jolma i.

3. Dung madabu jolma i tu dosa pola do hir hodok ni jolma i laho mangulahon ulaonna huhut manganhon panganonna jala marhoihoi do jolma i di ngoluna.

4. Nang pe marhoihoi jolma i di ngoluna , ndang satorusna hoihoina i di bahen Debata, alai disarihon Debata do jolma i jala diparmudu-mudu. Dipaumbang Debata do parsorion ni jolma i marhite Jesus naung ro tu portibion namandok: “Ro ma hamu na loja jala nasorat asa hupasonang hamu”

5. Angka namangaranap tu Debata do dilehon Debata sipanganon ditingkinan be. Jala Debata do mangalehon tu jolma i asa jolma i manjalosa. Jala ungkap do tangan ni Debata tu jolma i gabe taruli di nadenggan do jolma i.

6. Molo dung jumpa ditingki halehetanna lehonon ni Debata ma tu jolma i angka udan paremean, gabe tarpapungu jolma i ma eme dohot anggur dohot miak marhite naniulana.

 

Liturgi II = Respon ni Jolma i Taringot tu Panarihonon ni Debata

1. Holong situtu do rohangku di Ho ale Jahowa sipargogoi ahu ala dilehon Ho angka naringkot di ngolu on, jala Ho do napangoluhon ahu ido umbahaen so humasusa be ahu salelenglelengna.
2.  Holan Ho do Ale Tuhan siparmahan ahu ido umbahen so hahurangan be ahu di ngolu on. Ai dipatongon Ho do ahu tu angka jampalan na lomak, ditogutogu Ho do ahu di angka aek hasonangan

3. Alani hamu ale angka dongan, naeng ma taida angka denggan basa ni Jahowa jala tongtong ma hita marhaposan tu Jahowa, sai nadapotan tua do hita disaluhutna

4. Ai molo naung taoloi Debata di ngolunta on, aha pe napinangido ni rohanta sai nalehononna do di hita. Alani ale Tuhan Debata sai ro ma harajaonmu, sai saut ma lomo ni roham di banua tonga on songon na di banua ginjang. Jala lehon ma di hami ale Tuhan angka ngolu siganup ari.

5. Ajari ma hami di ngolu on mamilangi ariari ni ngolu on asa sai dapotan roha nabisuk hami
6. Alani i sai harajaonMu do tongtong na hulului di ngolungkon

Oleh: Pdt. Likson F. Simanjuntak, S.Th