Acara Kebaktian Syukuran

PARTONDING NI ACARA KEBAKTIAN SYUKURAN

PARTANGIANGAN TAHUNAN POMPARAN NI OP. TATAR NABABAN

PANIARAN, MINGGU; 15 JULI 2012

01.   VOTUM (P: Paragenda; J: Jemaat; K: Keluarga)

P             : Marhitehite goar ni Debata Ama, dohot Goar ni Anakna Jesus Kristus, dohot Goar ni Tondi Parbadia natumompa langit dohot tano on ma mandongani hita saluhutna.

P + J       : Pangkulingi ahu Tuhanku asa hutangihon Ho, patandahon tu rohangku natau pasonanghon Ho, sai pabosur tondingki dohot asi-asiMi. Amen

02.   MARENDE NO: 15: 4 +7

Mauliate ma rohangku di Ho O Debata tongtong. Dibaen sude denggan basamu naung nilehonMu di au on. Ai dipatongon Ho tongtong sude naringkot di au on.

Ai ise do mamasumasu Au on O Debata nda Ho?. Pamatonghon ro di tondingku sai diparmudumudu Ho. Huhut lambas rohami manatap pardosaonki.

03.   RESPONSORIA

P             :  Olophon ma Jahowa ale sandok tano on. Oloi hamu ma Jahowa marhite-hite las ni roha, ro be ma hamu marlas ni roha, ro be ma hamu tu joloNa marhitehite olopolop

J              : Boto hamu ma on: Jahowa do Debata, Ibana do jumadihon hita, jala Ibana nampuna hita, bahen bangsona dohot biru-biru pinarmahanna

P             : Bongoti hamu ma angka bahalna marhitehite hamauliateon, angka alamanna marhitehite pujipujian, mauliate ma rohamuna tu Ibana puji hamu ma Goarna.

P + J       : Pardenggan basa do Jahowa, ro di saleleng ni lelengna do asi ni rohana, jala marsundutsundut do hasintonganna.

P             : Martangiang ma hita: Hupuji hami do Ho Tuhan ala denggan ni basam napatolhashon ngolunami dibagasan asi ni roham sahat tu sadarion. Nungga dilehon Ho torop maribur pomparan di natua-tua nami Op. Tatar Nababan jala diloas Ho do nasida mandai angka pasupasuM marhite angka asi ni rohaM di ngoluna siganup ari. DipanumpakMu di ngolu ni angka pomparanna boi nasida sadarion patupa ulaon partangiangan tahunan, sai Ho ma antong ale Tuhan namanambai tu saluhut pomparan ni Op. Tatar on denggan ni basaM dohot lehon ma nang hahipason tu tambana nang angka pangabahan songoni nang angka torop ni par-ianakkonon nasida, asa jumpa songon pandohan ni hami halak batak; marurat tu toro, marbulung tu ginjang, huhut mardangka nang tu samping angka pomparanna tu jolo on. Natinggal di huta on songoni nang ditano parserahan i.  Oloi ma hami Tuhan namartangiang di bagasan Jesus Kristus Tuhan nami. Amen  

04.   MARENDE NO: 14: 2

Ingot tongtong ale tondingkon sude na denggan na di pasonggop Debata tu Ho. Denggan basana do pangoluhon ho.

05.   RENUNGAN SITUASIONAL

P             : Mandok maulite ma hamu tu Jahowa ai pardenggan basa do Ibana. Ai ro di saleleng ni lelengna do asi ni rohana. Diloas Tuhanta do hita marlasniroha, boi sanga dijalo hamu angka pomparan ni natua-tuanta Op.Tatar angka pasu-pasu ni Tuhan i, laos sadarion patupa kebaktian syukur tahunan hamu, ima mandok mauliate dipasu-pasu ni Tuhan naung jinalomu, huhut mangido angka pandonganion dohot panumpahion ni Tuhan i hamu dipardalanan mu tu jolo on. Antong dilehon Debata ma di hamu ganjang ni umur dohot angka pangabahan di hamu pompran ni Op. Tatar Nababan.  Antong manontong ma hamu mandok mauliate tu Tuhan i.

K             : Ale Tuhan Debata sai ajari ma hami laho mangulahon lomo ni rohaM, ai Ho do Debatanami, sai Tondimi ma manongihon hami ditano on.

J              : Arion do najinadihon ni Jahowa, marolopolop jala marlas ni roha ma hita disi. Iale Jahowa sai manumpak ma Ho, iale Jahowa sai Ho ma mambaen manjadi. 

P             : Pujima Tuhan i naung patolhas on tu hamu angka denggan basana i. Ai Tuhan i do napatudu tu hamu angka ngolu sidalanan muna.

K             : Tutu ingkon pujion nami ma Tuhan i, ai hinorhon asi ni rohana i do umbahen torop hami pomparan ni natua-tua nami Op. Tatar, jala dibagasan Tuhan i do hami taruli angka las niroha di ngolu nami on.

P + J + K: Holan dibagasan Ho ma hami Tuhan mangolu di ngolu nami on, jala sai tambai ma di hami roha na olo mamuji pasangap Ho. Amen

06.   MARENDE NO: 209: 1

Nasonang au, dung namar Tuhan au tu Tuhan Jesus i. Ai ndang adong dung naposona au siholsohononki. Ibana nama hu ihuthon portibion ma hutundalhon. Nasonang au, nasonang au.

07.   TANGIANG (SAHALAK SIAN ANAK, PARUMAEN, BORU DOHOT HELA/ IANAKKON)

08.   MARENDE NO: 262: 5

Ramoti au tongtong saleleng au mangolu. Matua pe au on pabenget ma rohangku.

Sotung marlindang maon tongtong parangengki. Ubanon pe au on naeng hot do sangaphi.

09.   TANGIANG SIAN PAHOMPU, BERE/ IBEBERE

10.   MARENDE NO: 227: 1 + 4

Jesus ngolu ni tondingku Ho do haporusanki. Gok di Ho nama diringku rodi nasa langkangki.

Tangkup au Jesus Tuhanku, tiop au mansai gomos. Asa unang runsur pathu sian dalan na tingkos

11.   TANGIANG PANGONDIANON SIAN HULA-HULA

12.   MARENDE NO: 210: 4

Mauliate ma rohangku dibaen napinarbagami. Ndang olo asi ni rohamu mansohot salelengna i. Sai hot do padan binaenmi nang pe na sego sasude.

13.   JAMITA/ RENUNGAN

14.   MARENDE NO: 90: 1 – 3 ---------------PELEAN

Pasumpasum tongosonmu ido didok Hatami. Suru Tondim nabadia bosur ma baen rohangki. Hagogoonmu songgop ma tu rohangkon. Unang sai holan manetek gohi sandok diringkon.

                                                                M  U  S  I  K

Buat ma angka pangambat unang songsong dalan i. Mual ni aek hangoluan ringkot do dirohangki. Hagogoonmu songgop ma tu rohangkon. Unang sai holan manetek gohi sandok diringkon.

M  U  S  I  K

Bereng ma sai hupaima nungga rade rohangki. Guru di Ho ma ngolungku dohot au tinobusmi. Hagogoonmu songgop ma tu rohangkon. Unang sai holan manetek gohi sandok diringkon.

15.   TANGIANG PANUTUP + PASU-PASU

P                             : Mandok mauliate ma hamu di Jahowa ai nabasa do Ibana, ai ro di salelenglelengna do asi ni rohana i

J                              : Tung ise ma tuk manghakatahon angka hagogoon ni Jahowa, patubegehon baritana i sudena?

P                             : Martua ma angka na mangaradoti uhum na tongtong patupahon hatigoran.

K                             : Sai ingot ma ahu ale Jahowa hombar tu halolomo di bangsom, sai tingkir ma ahu marhitehite hatuaonmi.

P + J + K                : Asa hupaidaida hami hadohoran ni angka napinillitmu, asa huhalashon halalas ni roha ni bangsomi, mamujimuji rap dohot partohapmi.

P                             : Martangiang ma hita pasahathon peleanta tu Debata. .................. (laos udutma pasu-pasu)

Written by: Pdt.L.F.Simanjuntak, S.Th/ Pendeta HKI Resort Paniaran – Simamora.

Alamat: Jl. Tarutung Km. 4 Komplek Gereja HKI Paniaran,  Siborongborong - TAPUT